„იარაღის შესახებ“  საქართველოს კანონის მიხედვით, ცივი იარაღი არის იარაღი, რომლის მოქმედებაც ხორციელდება ადამიანის ფიზიკური ძალით და რომელიც განკუთვნილია უშუალო შეხებით ობიექტის დასაზიანებლად. ცივი იარაღით სარგებლობის წესები წესრიგდება ადმინისტრაციულ სამართალდარღვევათა კოდექსითა და სისხლის სამართლის კოდექსით.

საქართველოს ადმინისტრაციულ სამართალდარღვევათა კოდექსის 181¹ მუხლის მიხედვით, ცივი იარაღის ტარება ქუჩაში, ეზოში, სტადიონზე, სკვერში, პარკში, საგანმანათლებლო დაწესებულებაში, სასამართლოში, აეროპორტში, კინოთეატრში, თეატრში, საკონცერტო დარბაზში, კაფეში, რესტორანში, ყველა სახის საზოგადოებრივ ტრანსპორტში, ავტოსადგურში, რკინიგზის სადგურში და სხვა საზოგადოებრივი თავშეყრის ადგილებში გამოიწვევს დაჯარიმებას 200 ლარის ოდენობით. იმავე ქმედების განმეორებით ჩადენა ადმინისტრაციული სახდელის დადებიდან 1 წლის განმავლობაში (რაც გულისხმობს, რომ პირს ადმინისტრაციული პასუხისმგებლობა უკვე ჰქონდა დაკისრებული ცივი იარაღის ტარებისთვის) გამოიწვევს დაჯარიმებას 1000 ლარის ოდენობით ან ადმინისტრაციულ პატიმრობას 15 დღე-ღამემდე ვადით.

გასათვალისწინებელია, რომ ზემოთ აღნიშნული მოწესრიგება არ ვრცელდება განზრახ მძიმე ან განსაკუთრებით მძიმე დანაშაულის ჩადენისათვის ნასამართლებ ან/და ნარკოტიკების მოხმარებისათვის ადმინისტრაციულსახდელდადებულ პირზე, რომელიც ცივი იარაღის ტარებისათვის პასუხს აგებს საქართველოს სისხლის სამართლის კოდექსის 238​¹  მუხლის შესაბამისად.  იმ შემთხვევის გარდა, როდესაც ცივი იარაღის ტარება იწვევს საჯარო წესრიგის დარღვევას ან ქმნის ამის აშკარა საფრთხეს, მოწესრიგება არ ვრცელდება პირზე, რომელიც ცივ იარაღს ატარებს:

ა) პირადი ჰიგიენის მოწესრიგების მიზნით;

ბ) საკვების მომზადების ან/და მიღების მიზნით;

გ) თავისი პროფესიული საქმიანობის განხორციელების მიზნით;

დ) ნადირობის, თევზაობის ან/და მცენარეული პროდუქტების შეგროვების მიზნით;

ე) სასოფლო-სამეურნეო საქმიანობის ან/და მესაქონლეობის განხორციელების მიზნით;

ვ) იმ დროს, როდესაც აცვია ეროვნული ტანსაცმელი და ცივი იარაღი (ხანჯალი, ხმალი და სხვ.) ამ ტანსაცმლის ნაწილია.

ადმინისტრაციულ სამართალდარღვევათა კოდექსის მიზნებისათვის „ცივი იარაღის ტარება“ გულისხმობს ისეთი  შემთხვევის არსებობას, როდესაც პირს თან აქვს ცივი იარაღი − უჭირავს ხელში, მიმაგრებული აქვს სხეულზე ან ინახავს ტანსაცმელში.

გასათვალისწინებელია, რომ პირს, რომელსაც აქვს მოკლელულიანი ცეცხლსასროლი იარაღის ტარების უფლება, აგრეთვე აქვს ცივი იარაღის ტარების უფლება.

რაც შეეხება სისხლის სამართლის კოდექსს, 238¹ მუხლის პირველი ნაწილის მიხედვით, ცივი იარაღის ტარებისათვის განმეორებით ადმინისტრაციულსახდელდადებული (გულისხმობს ისეთ შემთხვევას, როდესაც პირს ერთხელ უკვე დაეკისრა ჯარიმა ცივი იარაღების ტარებისთვის), ნარკოტიკების მოხმარებისათვის ადმინისტრაციულსახდელდადებული (მას ვისაც უკვე დაეკისრა ადმინისტრაციული პასუხისმგებლობა ნარკოტიკული ნივთიერების მოხმარებისთვის) ან განზრახი ნაკლებად მძიმე დანაშაულისათვის ნასამართლევი პირის მიერ ცივი იარაღის ტარება ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ექვსი თვის ვადით. აღნიშული მუხლის მეორე ნაწილის მიხედვით, ცივი იარაღის ტარება განზრახი მძიმე ან განსაკუთრებით მძიმე დანაშაულისათვის ანდა ცივი იარაღის ტარებისათვის ნასამართლევი პირის მიერ, ისჯება ჯარიმით ან თავისუფლების აღკვეთით ვადით სამ წლამდე.

დასახელებული მუხლი არ ვრცელდება პირზე, რომელიც ცივ იარაღს ატარებს, გარდა იმ შემთხვევისა, როდესაც ცივი იარაღის ტარება იწვევს საჯარო წესრიგის დარღვევას ან ქმნის ამის აშკარა საფრთხეს, მაშინ როდესაც პირი მას ატარებს იმავე მიზნით, რაც გათვალისწინებულია ადმინისტრაციულ სამართალდარღვევათა კოდექსის 181¹ მუხლით (იხ. ზემოთ მოყვანილი მსჯელობა). 

ისევე როგორც ადმინისტრაციული სამართალდარღვევის კოდექსის მიზნებისთვის სისხლის სამართლის კოდექსის მიზნებისათვისაც „ცივი იარაღის ტარება“ გულისხმობს ისეთი გარემოების არსებობას, როდესაც პირს თან აქვს ცივი იარაღი − უჭირავს ხელში, მიმაგრებული აქვს სხეულზე ან ინახავს ტანსაცმელში.

სალომე დარასელია